الأطفال و الحول
الأطفال و الحول
– تشخيص و علاج أمراض عيون الاطفال.
– تشخيص و علاج أنواع الحول المختلفة للاطفال و الكبار مثل الحول الوحشي و الأنسي و الرأسي و المتقطع.
– تشخيص و علاج امراض أعصاب العين المختلفة.
– ما هي أسباب الحول و طرق العلاج؟
ناس كتير بتفتكر ان انحراف العين أو الحول ملوش علاج سواء كان لأطفال أو كبار بيفتكروا ان الحول ده حاجه دايمه
لكن الحقيقة ان عنينا تقدر تتصلح في اي وقت و في أي سن و نبعد عن موضوع التنمر من أول المدرسة أو في الجامعة أو وقت الارتباط أو في شغلك أو كمان أنت تكون راضي عن نفسك متبقاش مكسوف أو مخبي عينك
تعريف الحول هو عبارة عن عدم وجود توازن بين العينين بيخلي العينين ميبصوش على نفس الصورة في نفس الوقت و أغلب حالات انحراف العين بتحصل منذ الطفولة
لكن طبعا هي ممكن تحصل في أي سن
أنواعها ممكن يكون الحول ثابت يعني موجود طول الوقت أو طول اليوم أو ممكن يكون متقطع يعني بيحصل في بعض الأوقات في اليوم
ممكن يكون في عين واحدة أو تبادلي
العين لما تنحرف للداخل ده يسمى حول أنسي أن يكون العينين بيبعدوا عن بعض و ده يسمى حول وحشي ممكن كمان العين بتطلع لفوق و تنزل لتحت أو تاخد زاوية معينة في حالات الحول الرأسي
– ما هي أسباب الحول و طرق العلاج؟
بالنسبة للحول الأنسي اللي هو العينين تتحرك للداخل لو حصل في اول ٦ شهور بعد الولاده بيبقى في الأغلب سببه خلقي و ده بيكون علاجه هو العمليه و مهم جدا تتعمل العمليه قبل سن السنة عشان في خلايا معينة بتتكون في المخ في الوقت ده بتشوف بعد كده الصورة مجسمة يعني ثلاثية الأبعاد و لها عمق
طيب تفرق في ايه؟ هتفرق جدا بعد كده في الكلية و في اختيار شغل معين
لو ظهر بعد كده الحول الأنسي يعني مثلا على عمر السنة و نصف في الأغلب يكون سببه هو طول النظر و ده بيكون علاجه نظارة طبية أو تمارين و في بعض الحالات عملية
بيجيلي أهل الطفل بيقولوا صعب جدا ان الطفل يلبس نضارة تعالوا ناخد المثال ده لو جه ابني او بنتي و قالوا احنا مش عايزين ناكل بنعمل ايه؟ هل بنقول خلاص بلاش تأكلوا النهارده أو الشهر اللي جاي لا طبعا بنحاول مرة و مرتين و عشرة و عشرين عشان احنا اللي بنبقى عارفين مصلحة أولادنا و لو مصلحتهم في لبس النظارة يبقى لازم نعمل كده
معلومة مهمة جدا ممنوع عمل تصحيح ابصار أو ليزك في الأطفال
بالنسبة للنوع الثاني إللي هو الحول الوحشي يعني العينين بيبعدوا عن بعض و ده في الأغلب بيبتدي متقطع و في سن متأخر شوية غير اللي الطفل بيتولد بيه و بنعمله عملية مبكرة
لكن احنا بنأخر عملية اصلاح الحول الوحشي المتقطع لبعد ٤ سنوات عشان هو ممكن يتحسن بالنظارة و التمارين
طبعا لو الحول ظهر في اي سن مينفعش يتاخد ببساطة لأنه ممكن يكون نتيجة أسباب كثيرة جدا
كمان مينفعش أقول إن أنا عندي حول و خلاص هتفضل دائمه لكن أقدر أعالجها في أي سن
لسة عامل عمليه حول لمريضة عمرها ٧٠ سنه و بعد العمليه كانت مبسوطه جدا من نفسها و قدرت تشوف الحياه برؤيه جديده
لازم تصدقي انك هتشوفي الحياه بشكل جديد
متخبيش عنيك و خليك دايما فاكر إن عينك كنز غالي علينا
دكتور نادر ممتاز داود استشاري طب و جراحة العيون و زميل الكلية الملكية البريطانية لجراحي العيون جلاسكو
